Tha Sgoil Ealain UHI a Tuath, an Iar + Innse Gall, ann an Taigh Chearsabhagh, a’ tabhann cothruim gun shamhla gus ionnsachadh ann an àrainneachd shònraichte Innse Gall. Tha na h-eileanan againn nam bunait airson cruthachadh agus ùr-ghnàthachas. Gach taobh a choimheadas tu, gheibh thu brosnachadh – bhon chruth-tìre eireachdail againn, is an eachdraidh, na traidiseanan agus na daoine a tha a’ toirt cruth don chultar is don dualchas bheairteach againn.
Tha an sgìre againn na dhachaigh do roinn ealain chruthachail shoirbheachail, stèidhichte sa choimhearsnachd, is a tha a’ faighinn taic bho cho-obrachadh lionrà de luchd-ealain, dealbhadairean is luchd-ciùird.
Tha an dàimh shònraichte eadar an Sgoil Ealain agus Taigh-tasgaidh is Ionad Ealain Thaigh Chearsabhagh aig cridhe na h-àrainneachd ionnsachaidh is teagaisg. Tha cothrom aig oileanaich a dhol gu taisbeanaidhean, òraidean bho luchd-ealain agus tachartasan eadar-chuspaireil. Bidh oileanaich cuideachd a’ buannachadh bhon chothrom a bhith a’ taisbeanadh ann an gailearaidhean Thaigh Chearsabhagh agus a’ cleachdadh nan goireasan phroifeiseanta airson clò-bhualaidh agus an seòmar-dorcha.
Cùrsaichean
Ge brith a bheil thu nad sgoilear san àrd-sgoil, no air an sgoil fhàgail bho choinn ghoirid, nad inbheach a’ tilleadh gu foghlam, no nad phroifeiseantachd ag amas air sgilean a leasachadh no dreuchd atharrachadh, tha an Sgoil Ealain a’ tabhann roghainn choileanta de chùrsaichean.
Cùrsaichean ealain aig Taigh Chearsabhagh:
- NC Ealain + Dealbhadh SCQF 6
Tha cùrsa NC Ealain + Dealbhadh SCQF 6 a’ tàladh farsaingeachd de luchd-ionnsachaidh, às an àite agus bho nas fhaide air falbh. Nam measg tha oileanaich nas òige a tha a-mach às an sgoil, a bharrachd orrasan a tha a’ tilleadh gu foghlam an dèidh ùine. Le buidhnean ionnsachaidh beaga agus teagasg bho ghrunnan oidean le eòlas shònraichte, tha an t-ionnsachadh làn dhùbhlain ùra agus cothroman cruthachail. Tha ullachadh portfolio an lùib structar a’ chùrsa, do dh’oileanaich a tha am beachd gluasad air adhart gu cùrsaichean ealain Foghlam Àrd-ìre.
- BA (le Urram) Ealain Fhìnealta
Tha cùrsa BA (le Urram) Ealain Fhìnealta ga theagasg le sgioba luchd-ealain lèirsinneach air leth comasach, is bheir e cothrom dhut measgachadh de mheadhanan ealain fhìnealta fheuchainn agus a rannsachadh, leithid peantadh, ìomaighean didseatach, dealbhadaireachd, cruthan, dealbhan, clò-bhualadh agus obair fighte. Le àite-obrach dhuibh fhèin san stiùidio agus uidheam obrach spèisealta, faodaidh tu a bhith misneachail gu bheil na goireasan air fad a tha a dhìth ort ri làimh.
- Cùrsaichean àrd-ìre do sgoilearan AS4-6
Gus cothrom a thabhann do sgoilearan a bhith ceum air adhart air a’ chùrsa-beatha a tha iad a’ cur romhpa, tha an Sgoil Ealain ag obair cuide ri buidhnean foghlaim airson slighean freagarrach a’ lìbhrigeadh, a dh’ionnsaigh fastadh, treànadh no foghlam adhartach / àrd-ìre, gus am faigh thu na sgilean is teisteanasan airson do chuideachadh ullachadh airson do dhreuchd san àm ri teachd.
Goireasan
Stiùidio – Le còrr is 140 meatair ceàrnagach de stiùidiothan fosgailte, a’ coimhead an ear thairis air a’ Chuan Sgìth, ’s urrainn do dh’oileanaich a bhith ag obair air bheachdan aig meud, anns an àite aca fhèin.
Gailearaidhean – Tha trì diofar gailearaidhean ann an Taigh Chearsabhagh. ’S urrainn do dh’oileanaich iarrtas a chur a-steach airson taisbeanadh ann an Gailearaidh a’ Chafaidh. Bidh oileanaich BA a’ faighinn tabhann air taic theicnigeach airson stàlaidhean adhartach, phroifeiseanta, airson taisbeanaidhean ceuma a shuidheachadh sna prìomh ghailearaidhean.
Aite-obrach Clò-bhualaidh & Seòmar Dorcha – Tha na stiùdiothan seo a’ tabhann àite-obrach phroifeiseanta do dh’oileanaich aig gach ìre eòlais, airson obrachadh annta agus airson co-obrachadh le luchd-ealain ionadail eile.
Cuir fios
Airson tuilleadh fiosrachaidh mu chothroman ionnsachaidh aig Sgoil Ealain UHI a Tuath, an Iar + Innse Gall, cuir fios gu Stiùiriche nan Cùrsaichean:
Fòn: 01851 770 294
Postd: leart@uhi.ac.uk
Lean Sgoil Ealain UHI a Tuath, an Iar + Innse Gall air na meadhanan sòisealta:
Facebook:
Instagram: